पालिका प्रशासन: नवी मुंबईतील जुन्या चिचपाडा परिसरात राहणाऱ्या ३५ वर्षीय विधवा ज्योती बृजेश गायकवाड आणि त्यांच्या १३ वर्षीय अल्पवयीन मुलीवर होणाऱ्या मानसिक, शारीरिक आणि लैंगिक अत्याचाराच्या गंभीर प्रकरणात रबाळे MIDC पोलिसांनी निष्क्रियता दाखवल्याचा धक्कादायक प्रकार समोर आला आहे. ज्योती गायकवाड यांनी मुख्यमंत्री कार्यालय, महिला व बालकल्याण विभाग, नवी मुंबई पोलीस आयुक्त, उपायुक्त (झोन १) आणि रबाळे MIDC पोलीस स्टेशनच्या वरिष्ठ पोलीस निरीक्षकांना लेखी तक्रार देऊन पोलिसांच्या या निष्क्रियतेवर कडक कारवाईची मागणी केली आहे. त्यांनी ही तक्रार एक्सवर पोस्ट केली आहे.

ज्योती गायकवाड यांनी आपल्या तक्रारीत नमूद केले आहे की, कोरोना काळात आर्थिक अडचणींमुळे त्यांनी दीपक उपाध्याय यांच्याकडून १५,००० रुपयांचे कर्ज घेतले होते, जे त्यांनी पूर्णपणे परत केले आहे. मात्र, त्यानंतर दीपक उपाध्याय, अमन सिंह आणि आकाश उपाध्याय यांनी दारूच्या नशेत त्यांच्यावर आणि त्यांच्या अल्पवयीन मुलीवर वारंवार मानसिक, शारीरिक आणि लैंगिक अत्याचार केले. “आरोपींनी मला शिव्या दिल्या, जीवे मारण्याच्या धमक्या दिल्या आणि माझ्या मुलीला चुकीच्या पद्धतीने हात लावण्याचा प्रयत्न केला. यामुळे माझ्या मुलीच्या मानसिक आणि शारीरिक आरोग्यावर गंभीर परिणाम झाला आहे. तसेच, दीपक उपाध्याय आणि अमन सिंह यांनी माझ्या जातीविषयी अपशब्द वापरले,” असे ज्योती यांनी तक्रारीत म्हटले आहे.

या प्रकरणात सर्वात गंभीर बाब म्हणजे रबाळे MIDC पोलीस स्टेशनच्या पोलिसांनी दाखवलेली निष्क्रियता. ज्योती यांनी तक्रार देण्यासाठी पोलीस स्टेशनला भेट दिली असता, आरोपी तिथे उपस्थित असताना पोलीस हवालदार गणेश झगणे आणि महेश डेरे यांनी त्यांना मदत केल्याचा आरोप आहे. “आरोपींनी स्वतः सांगितले की त्यांचे राजकीय संपर्क मजबूत असल्याने त्यांचे काहीही बिघडणार नाही,” असे ज्योती यांनी तक्रारीत नमूद केले आहे. या पोलिसी निष्क्रियतेमुळे ज्योती आणि त्यांच्या मुलीच्या सुरक्षेला आणखी धोका निर्माण झाला आहे.

ज्योती यांनी भारतीय दंडसंहिता, बालसंरक्षण कायदा (POCSO), आणि भारतीय संविधानातील कलम २१ च्या तरतुदींनुसार त्वरित कायदेशीर कारवाई, सखोल चौकशी, पोलिसांच्या निष्क्रियतेबाबत विभागीय चौकशी आणि त्यांच्या व त्यांच्या मुलीच्या २४ तास सुरक्षेसाठी तात्काळ पोलीस संरक्षणाची मागणी केली आहे. तसेच, या प्रकरणातील कारवाईची माहिती लेखी स्वरूपात देण्याची विनंतीही त्यांनी केली आहे.

या घटनेने नवी मुंबईतील पोलिसी यंत्रणेच्या कार्यक्षमतेवर गंभीर प्रश्नचिन्ह उपस्थित केले आहे. एका विधवेवर आणि अल्पवयीन मुलीवर होणाऱ्या अत्याचारांबाबत तक्रार करूनही पोलिसांनी कारवाई न केल्याने सामान्य नागरिकांचा कायद्यावरील विश्वास डळमळीत होत आहे. याप्रकरणी तात्काळ कारवाई आणि पारदर्शक तपासाची मागणी जोर धरत आहे. नवी मुंबई पोलीस आणि संबंधित यंत्रणा या गंभीर प्रकरणात कोणती पावले उचलतात, याकडे सर्वांचे लक्ष लागले आहे.

https://x.com/Shailen62338266/status/1960941122567725400?t=WS7-85SMHOI9HYson-iwRQ&s=19