पालिका प्रशासन : मराठा आरक्षणाच्या मागणीसाठी महाराष्ट्राच्या कानाकोपऱ्यातून मुंबईच्या दिशेने निघालेल्या लाखो वाहने आणि आंदोलकांना सुरक्षितपणे नवी मुंबईतून मुंबईकडे वळण्यासाठी सरकार आणि पोलिस यंत्रणा प्रयत्नशील असल्याची माहिती समजते. मनोज जरांगे पाटील यांच्या नेतृत्वाखालील हा मोर्चा २९ ऑगस्ट रोजी मुंबईतील आझाद मैदानावर धडकणार आहे. मात्र, नवी मुंबई पोलिसांनी या मोर्चाला शहरातून पुढील ठिकाणी मार्गस्थ होण्यासाठी रणनीती आखली असली तरी, यामुळे नवी मुंबईतील वाहतूक व्यवस्थेवर काही परिणाम होण्याची शक्यता आहे. याचा सामान्य नवी मुंबईकरांना मानसिक आणि शारीरिक त्रास सहन करावा लागणार आहे.

मराठा आरक्षण मोर्चा २७ ऑगस्टपासून जालना जिल्ह्यातील अंतरवाली सराटी येथून निघाला असून, तो २९ ऑगस्ट रोजी रात्री मुंबईच्या आझाद मैदानावर पोहोचण्याची शक्यता आहे. मोर्चाच्या मार्गात नवी मुंबई हे महत्त्वाचे ठिकाण असून, येथे मोठ्या संख्येने आंदोलक एकत्र येणार आहेत. यासाठी पोलिसांनी कडक बंदोबस्त आणि वाहतूक नियोजनाची तयारी केली आहे. २५ जानेवारी २०२४ रोजी झालेल्या मराठा मोर्चाच्या वेळी नवी मुंबईत अशाच प्रकारे वाहतूक बदल करण्यात आले होते, ज्यामुळे स्थानिकांना मोठा त्रास सहन करावा लागला होता. यावेळीही, आज रात्रीपासून पुढील काही दिवस नवी मुंबईतील वाहतूक व्यवस्थेवर गंभीर परिणाम होण्याची शक्यता आहे. अवजड वाहनांना शहरात प्रवेश आणि पार्किंगवर बंदी घालण्यात आली आहे.

यांमुळे, नवी मुंबईतील सामान्य नागरिकांना त्रास होण्याची शक्यता आहे. तर, स्थानिकांना ये-जा करण्यात अडचणी येणार असून, गणेशोत्सवाच्या काळात आधीच वाढलेली गर्दी यामुळे आणखी त्रासदायक ठरणार आहे. स्थानिक रहिवाशांचे म्हणणे आहे की, पोलिसांचे नियोजन मंत्र्यांसाठी आणि सरकारी अधिकाऱ्यांसाठी (अटल सेतू मार्गे) रस्ते मोकळे ठेवण्यावर केंद्रित आहे, तर सामान्य नागरिकांना वाहतूक कोंडी आणि मानसिक त्रास सहन करावा लागणार आहे.

मनोज जरांगे पाटील यांनी यापूर्वीच सरकार आणि पोलिसांना इशारा दिला आहे की, “आंदोलनात कोणत्याही आंदोलकाला त्रास झाला तर सरकारला गंभीर परिणामांना सामोरे जावे लागेल.” काही स्थानिकांनी पोलिसांवर राजकीय दबावाखाली काम करत असल्याचा आरोपही केला आहे. तर, मराठा आरक्षणासाठी मनोज जरांगे यांनी सरकारला २६ ऑगस्टपर्यंत ठोस निर्णय घेण्याचा अल्टिमेटम दिला होता. मात्र, सरकारने याबाबत ठोस पावले उचलली नसल्याने हा मोर्चा आयोजित करण्यात आला आहे. आंदोलकांनी ओबीसी कोट्यातून आरक्षणाची मागणी लावून धरली असून, यासाठी लाखो मराठा बांधव मुंबईत एकत्र येण्याची शक्यता आहे. या मोर्चामुळे नवी मुंबई आणि मुंबईतील कायदा व सुव्यवस्था राखण्यासाठी पोलिसांवर विशेषत: गणेशोत्सवाच्या पार्श्वभूमीवर मोठा ताण येणार आहे.

या प्रकरणात नवी मुंबई पोलिस आणि सरकार कोणती पावले उचलतात, आणि सामान्य नागरिकांचा त्रास कमी करण्यासाठी काय उपाययोजना करतात, याकडे सर्वांचे लक्ष लागले आहे. दरम्यान, नवी मुंबईकरांना वाहतूक कोंडी आणि मानसिक त्रासाला सामोरे जावे लागणार असल्याने स्थानिकांमध्ये नाराजी पसरत आहे.