पालिका प्रशासन : बेलापूर विभागातील पारसिक हिल येथील रस्त्याच्या बाजूला असणारे क्रॅश बॅरियर तीन ठिकाणी तुटलेल्या अवस्थेत असून, याकडे नवी मुंबई महानगरपालिकेच्या बेलापूर विभागातील स्थापत्य विभागाने पूर्णपणे दुर्लक्ष केले आहे. स्थानिकांनी याबाबत वारंवार तक्रारी करूनही दुरुस्तीचे कोणतेही पाऊल उचलले गेले नसल्याने या ठिकाणी वाहन अपघाताचा गंभीर धोका निर्माण झाला आहे.

पारसिक हिल परिसरातील रस्ता हा वाहतुकीसाठी महत्त्वाचा असून, येथे मोठ्या प्रमाणात वाहनांची ये-जा असते. तुटलेल्या क्रॅश बॅरियरमुळे वाहनचालकांचे नियंत्रण सुटल्यास थेट जीवितहानी आणि वित्तहानी होण्याची भीती व्यक्त केली जात आहे. स्थानिक नागरिकांनी महानगरपालिकेच्या स्थापत्य विभागाकडे याबाबत अनेकदा लेखी आणि तोंडी तक्रारी नोंदवल्या, परंतु अद्याप कोणतीही कार्यवाही झालेली नाही.

“हा रस्ता रोज वापरला जातो, पण क्रॅश बॅरियरची दुरवस्था पाहता अपघाताची शक्यता खूप जास्त आहे. महानगरपालिका याकडे गांभीर्याने का पाहत नाही?” अशी खंत यां रस्त्याचा दररोज वापर करणाऱ्यांनी व्यक्त केली आहे.

याबाबत तज्ज्ञांचे मत आहे की, क्रॅश बॅरियर हा रस्ता सुरक्षेचा अविभाज्य भाग असून, त्याची तातडीने दुरुस्ती करणे आवश्यक आहे. जर भविष्यात या ठिकाणी अपघात झाला, तर त्यामुळे होणारी जीवितहानी आणि वित्तहानी याची संपूर्ण जबाबदारी महानगरपालिकेच्या स्थापत्य विभागाची असेल, असा इशारा नागरिकांनी दिला आहे.

महानगरपालिकेच्या स्थापत्य विभागाने या प्रकरणी तातडीने लक्ष घालून क्रॅश बॅरियर दुरुस्त करावे, अशी मागणी नागरिकांनी केली आहे. अन्यथा, येणाऱ्या काळात येथे होणाऱ्या संभाव्य अपघातांना प्रशासनच जबाबदार ठरेल, असे नागरिकांचे म्हणणे आहे.