पालिका प्रशासन : सीबीडी डोंगरावरील धार्मिक वारसा असलेल्या देवस्थानांना कायमस्वरूपी संरक्षित करण्यासाठी सिडकोने धोरण आखण्याचा निर्णय घेतला आहे. या निर्णयाचे स्वागत करत बेलापूर विधानसभेच्या भाजप आमदार मंदाताई म्हात्रे यांनी सिडकोच्या या पुढाकाराचे कौतुक केले आहे. सिडकोच्या व्यवस्थापकीय संचालकांसोबत नुकत्याच झालेल्या बैठकीनंतर मंदाताई म्हात्रे यांनी माध्यमांशी बोलताना ही माहिती दिली.

आ. मंदाताई म्हात्रे यांनी गेल्या अनेक वर्षांपासून सीबीडी बेलापूर परिसरातील डोंगरावरील देवस्थानांच्या संरक्षणासाठी सातत्याने पाठपुरावा केला आहे. त्यांच्या या प्रयत्नांना आता सिडकोच्या धोरणामुळे बळ मिळणार आहे. “ही देवस्थाने आपल्या सांस्कृतिक व धार्मिक वारशाचे प्रतीक आहेत. त्यांचे संरक्षण करणे ही आपली जबाबदारी आहे. सिडकोने या दिशेने पाऊल उचलणे अत्यंत प्रशंसनीय आहे,” असे मंदाताई म्हणाल्या. त्यांनी या बैठकीत सिडको अधिकाऱ्यांसमोर देवस्थानांच्या संवर्धनासाठी दीर्घकालीन योजना आणि स्थानिक नागरिकांच्या सहभागावर भर दिला.

बेलापूर विधानसभेतील नागरिकांनी त्यांच्या या कार्याची प्रशंसा केली असून, स्थानिक धार्मिक संघटनांनीही त्यांच्या पाठपुराव्याचे स्वागत केले आहे. “आ. मंदाताईंनी आमच्या भावनांचा आदर करत देवस्थानांच्या संरक्षणासाठी पुढाकार घेतला. यामुळे आमच्या श्रद्धास्थानांचे जतन होईल,” असे स्थानिक रहिवाश्यांचे मत आहे.

तर, या मुद्द्यामुळे मंदाताई म्हात्रे यांची सांस्कृतिक वारसा जपणारी आणि स्थानिक समस्यांवर लक्ष देणारी प्रतिमा अधिक दृढ होईल. आ. मंदाताईंच्या या पुढाकारामुळे सिडको आणि स्थानिक प्रशासन यांच्यातील समन्वय वाढून बेलापूर परिसराच्या सर्वांगीण विकासाला चालना मिळेल, अशी अपेक्षा व्यक्त होत आहे.