पालिका प्रशासन/प्रतिनिधी: पावसाळा तोंडावर येऊन ठेपला असताना नवी मुंबई  महानगरपालिकेच्या अभियांत्रिकी विभागातील आवश्यक नागरी कामांना ‘लग्नसराई’चा अडथळा निर्माण झाला आहे. बहुतांश अभियंते लग्नकार्यांना उपस्थित राहण्यासाठी सुट्ट्या घेत असल्याने किंवा अर्धा दिवस गैरहजर राहत असल्याने महत्त्वाची स्थापत्य कामे रखडण्याची भीती आहे. विशेष म्हणजे, १५ मे नंतर कोणत्याही प्रकारची स्थापत्य कामे करण्यास आयुक्तांनी मनाई केली आहे, त्यामुळे या कालावधीत कामे पूर्ण करण्याचे आव्हान अभियांत्रिकी विभागासमोर आहे.

सध्या लग्नसर वाढत्या संख्येने आणि सामाजिक बांधिलकीमुळे अभियंत्यांना कामावर पूर्णवेळ हजर राहणे कठीण झाले आहे. अनेक अभियंते लग्नकार्यांसाठी सुट्टी घेत असून, काहींनी ‘हाफ डे’च्या नावाखाली कामावरून गायब होण्याचा मार्ग निवडला आहे. यामुळे रस्ते दुरुस्ती, पाणीपुरवठा, ड्रेनेज व्यवस्था आणि इतर नागरी सुविधांच्या कामांवर परिणाम होत आहे. पावसाळ्यात नागरिकांना त्रास होऊ नये यासाठी ही कामे तातडीने पूर्ण करणे गरजेचे आहे, परंतु अभियंत्यांच्या अनुपस्थितीमुळे कामांचा वेग मंदावला आहे.

“लग्नसराई हा सामाजिकदृष्ट्या महत्त्वाचा भाग आहे, पण नागरी कामांची जबाबदारीही तितकीच महत्त्वाची आहे. अभियंत्यांनी सुट्ट्या नियोजनपूर्वक घ्याव्यात,” असे एका वरिष्ठ अधिकाऱ्याने नाव न सांगण्याच्या अटीवर सांगितले. दरम्यान, आयुक्तांनी १५ मे नंतर स्थापत्य कामांवर निर्बंध घातल्याने उर्वरित कालावधीत कामे पूर्ण करण्यासाठी प्रशासनाने तातडीने उपाययोजना करण्याची गरज आहे. यासाठी अतिरिक्त कर्मचारी नेमणे किंवा सुट्टीवरील अभियंत्यांना परत बोलावणे यासारखे पर्याय विचारात घेतले जाऊ शकतात.

नागरिकांनीही या परिस्थितीवर नाराजी व्यक्त केली आहे. “पावसाळ्यात रस्त्यांवर खड्डे आणि पाणी साचण्याच्या समस्या वाढतात. आता कामे वेळेत पूर्ण झाली नाहीत, तर यंदाही तेच हाल होणार,” असे काही स्थानिकांनी सांगितले. प्रशासन आणि अभियंते यांच्यात समन्वय साधून ही समस्या लवकरात लवकर सोडवण्याची मागणी आता जोर धरू लागली आहे.