पालिका प्रशासन/प्रतिनिधी : नवी मुंबई महानगरपालिका (NMMC) रुग्णालयाने प्रसूतीनंतर फोर्टिस हॉस्पिटलमध्ये रेफर केलेल्या ३२ वर्षीय महिलेचा मृत्यू झाल्याची धक्कादायक घटना समोर आली आहे. अति रक्तस्त्राव आणि ‘अ‍ॅम्निऑटिक फ्लुइड एम्बॉलिझम’ (AFE) या गुंतागुंतीमुळे महिलेचा मृत्यू झाल्याचे रुग्णालय प्रशासनाने सांगितले असले, तरी नातेवाइकांनी वैद्यकीय हलगर्जीपणाचा गंभीर आरोप केला आहे. या प्रकरणाने आरोग्य सेवांच्या गुणवत्तेवर आणि रुग्णालयांच्या कार्यपद्धतीवर प्रश्नचिन्ह उपस्थित केले आहे.

मृत महिलेच्या नातेवाईकांच्या म्हणण्यानुसार, प्रसूतीदरम्यान महिलेला अति रक्तस्त्राव झाला, परंतु महानगरपालिका रुग्णालयातील डॉक्टरांना हे दोन तासांनंतर लक्षात आले. रक्तस्त्रावामुळे महिलेच्या शरीरातील रक्त कमी झाल्याचे निदान झाल्यानंतर तिला तातडीने वाशी येथील फोर्टिस रुग्णालयात रेफर करवून हलवण्यात आले. मात्र, फोर्टिस रुग्णालयाने उपचार सुरू करण्यापूर्वी नातेवाइकांकडून ८०,००० रुपये आणि त्यानंतर १.५ लाख रुपये असे एकूण २.३ लाख रुपये उपचार शुल्क आकारले. तरीही, महिलेचा जीव वाचवण्यात डॉक्टरांना यश आले नाही.

नातेवाईकांनी आरोप केला आहे की, महानगरपालिका रुग्णालयात वेळेवर आणि योग्य उपचार मिळाले नाहीत, तसेच फोर्टिस रुग्णालयाने आर्थिक दबाव टाकला व पैसे भरूनही त्यांच्याकडून उपचारात विलंब झाला, ज्यामुळे महिलेचा मृत्यू झाला. “महापालिका रुग्णालयात डॉक्टरांनी वेळेवर लक्ष दिले असते, तर ही वेळ आली नसती. तर, फोर्टिसमध्ये पैसे भरण्यासाठी दबाव टाकला गेला, पण तरीही ती वाचली नाही,” असे मृत महिलेच्या एका नातेवाइकाने सांगितले.

महानगरपालिका रुग्णालयाच्या वैद्यकीय विभागाने महिलेचा मृत्यू ‘अ‍ॅम्निऑटिक फ्लुइड एम्बॉलिझम’ (AFE) मुळे झाल्याचे सांगितले आहे. AFE ही गर्भधारणेदरम्यान उद्भवणारी एक दुर्मीळ आणि गंभीर गुंतागुंत आहे, ज्यामुळे गर्भजल किंवा भ्रूणातील पेशी मातेच्या रक्तप्रवाहात प्रवेश करतात, परिणामी हृदयविकाराचा झटका येऊ शकतो. मात्र, नातेवाईकांचा दावा आहे की, रक्तस्त्रावावर वेळीच नियंत्रण ठेवले असते, तर ही परिस्थिती टाळता आली असती.

महानगरपालिका रुग्णालयाने या प्रकरणाबाबत तपास सुरू केल्याचे जाहीर केले आहे. “आम्ही या घटनेची सखोल चौकशी करत आहोत. रुग्णालयातील सर्व प्रक्रिया नियमानुसार पार पडल्या असून, महिलेच्या प्रकृतीत अचानक बिघाड झाल्याने तिला तातडीने फोर्टिस रुग्णालयात हलवण्यात आले,” असे रुग्णालय प्रशासनाने स्पष्ट केले.

या प्रकरणाने सरकारी आणि खासगी रुग्णालयांच्या कार्यपद्धतीवर प्रश्न उपस्थित केले आहेत. विशेषतः, सरकारी रुग्णालयातून रेफर केल्यानंतर खासगी रुग्णालयांमध्ये रुग्णांना आर्थिक दबावाचा सामना करावा लागतो, याकडे लक्ष वेधले आहे.

या घटनेने नवी मुंबईतील नागरिकांमध्ये तीव्र नाराजी पसरली आहे. सामाजिक माध्यमांवरही या प्रकरणाची चर्चा सुरू असून, दोषींवर कठोर कारवाईची मागणी होत आहे. “जर सरकारी रुग्णालयात योग्य उपचार मिळाले नाहीत आणि खासगी रुग्णालये पैसे उकळत असतील, तर सामान्य माणूस कुठे जाणार?” असा सवाल नागरिकांमध्ये उपस्थित झाला आहे.

नातेवाईकांनी दोषी डॉक्टर आणि रुग्णालय प्रशासनावर फौजदारी आणि न्यायिक कारवाईची मागणी केली आहे. तर, “नवी मुंबईतील आमदार ताई, मंत्री दादा आणि लोकसभेचे कार्यतत्पर खासदार यांच्याकडून या प्रकरणी आवाज उठवला जाईल की नाही?” असा सवाल नातेवाईकांनी उपस्थित केला आहे, ज्यामुळे स्थानिक राजकीय नेत्यांवरही दबाव वाढला आहे.

स्त्रीरोग तज्ज्ञांच्या मते, अ‍ॅम्निऑटिक फ्लुइड एम्बॉलिझम ही अत्यंत दुर्मीळ आणि धोकादायक स्थिती आहे, ज्यामध्ये तात्काळ वैद्यकीय हस्तक्षेप आवश्यक असतो. “अति रक्तस्त्राव आणि AFE यांचा एकत्रित परिणाम घातक ठरू शकतो. यासाठी रुग्णालयात प्रशिक्षित कर्मचारी आणि तात्काळ उपचार सुविधा असणे गरजेचे आहे,” असे एका तज्ज्ञाने सांगितले.

नवी मुंबई महानगरपालिकेच्या आयुक्तांनी या प्रकरणाची गंभीर घेण्याची गरज असून, याबाबत तपास समिती स्थापन करून, या घटनेची निष्पक्ष चौकशी करून आणि दोषींवर कारवाई  तसेच आरोग्य सेवांच्या सुधारणेसाठी पावले उचलने आवश्यक आहे.

या ३२ वर्षीय महिलेच्या मृत्यूने नवी मुंबई महानगरपालिका रुग्णालयाच्या आरोग्य सेवांवरील विश्वासाला तडा गेला आहे. सरकारी रुग्णालयातील कथित हलगर्जीपणा आणि खासगी रुग्णालयातील आर्थिक दबाव यामुळे एका तरुण मातेचा जीव गेल्याने समाजात संतापाची लाट उसळली आहे. या प्रकरणाची सखोल चौकशी आणि दोषींवर कठोर कारवाई झाल्यासच अशा घटनांना आळा बसेल, अशी अपेक्षा व्यक्त होत आहे.