प्रतिनिधी/पालिका प्रशासन : सिडको महामंडळातर्फे सिडकोच्या नवी मुंबईतील उलवे नोडमधील बामणडोंगरी गृहसंकुलातील 243 दुकानांच्या विक्रीची योजना जाहीर करण्यात आलेली आहे. या योजने अंतर्गत कनेक्टिव्हीटीच्या दृष्टीकोनातून परिपूर्ण असलेल्या उलवे नोडमध्ये 243 दुकाने व्यावसायिकांकरिता उपलब्ध करून देण्यात आली आहेत. दुकाने विक्रीच्या ऑनलाइन नोंदणी प्रक्रियेस 14 मार्च 2024 पासून सुरुवात होणार आहे. 

या योजनेच्या माध्यमातून सिडकोच्या उलवे नोडमधील बामणडोंगरी गृहसंकुलातील 243 दुकाने ई-निविदा तथा ई-लिलाव प्रक्रियेद्वारे विक्रीकरिता उपलब्ध करून देण्यात आली आहेत. सदर प्रक्रियेकरिता https://eauction.cidcoindia.com/ हे संकेतस्थळ उपलब्ध करून देण्यात आले आहे. योजनेकरिता ऑनलाइन नोंदणीचा कालावधी 14 मार्च 2024 ते 13 एप्रिल 2024 हा आहे. योजनेचा निकाल 15 एप्रिल 2024 रोजी जाहीर करण्यात येईल. 

उलवे नोडला रेल्वे आणि रस्ते यांद्वारे उत्तम कनेक्टिव्हिटी लाभली आहे. बामणडोंगरी येथील सिडको गृहसंकुलास नेरूळ-उरण उपनगरीय रेल्वे मार्गावरील बामणडोंगरी स्थानकाद्वारे कनेक्टिव्हिटी लाभली आहे. तसेच एमएटीएचएल सागरी सेतूपासूनदेखील या गृहसंकुलाचा परिसर नजीकच्या अंतरावर आहे. सर्व पायाभूत सोयी सुविधांनी परिपूर्ण असलेल्या या परिसराच्या विकासाकरिता सिडकोचे नवी मुंबई आंतरराष्ट्रीय विमानतळ आणि जेएनपीटी बंदर हे प्रेरक घटक ठरणार आहेत. 

सिडकोतर्फे सातत्याने निवासी व वाणिज्यिक भूखंड, दुकाने, वाणिज्यिक जागा (Commercial Premises) यांच्या विक्रीच्या योजना राबविण्यात येतात. आजवर राबविण्यात आलेल्या योजनांना नागरिक, व्यावसायिक, विकासक इ. घटकांचा उत्तम प्रतिसाद लाभला आहे. या योजनेद्वारे उलवे परिसरामध्ये व्यवसाय वृद्धीची संधी व्यावसायिकांना उपलब्ध झाली असून विशेषत:, मध्यम व लहान व्यावसायिकांकरिता ही योजना अत्यंत उपयुक्त ठरणारी आहे. तरी अधिकाधिक व्यावसायिकांनी या योजनेचा लाभ घ्यावा, असे आवाहन सिडकोतर्फे करण्यात आले आहे.

सिडकोने नवी मुंबईतील उलवे नोड या वेगाने विकसित होणाऱ्या परिसरातील दुकानांच्या विक्रीची योजना सादर केली आहे. विशेषत:, मध्यम व लहान व्यावसायिकांकरिता ही योजना अत्यंत उपयुक्त ठरणारी असून अधिकाधिक व्यावसायिकांनी या योजनेचा लाभ घ्यावा, असे आवाहन मी करतो.”-  विजय सिंघल

(उपाध्यक्ष तथा व्यवस्थापकीय संचालक, सिडको)