मालमत्ता खरेदी नंतर सांकेतिक क्रमांकाद्वारे स्वयंचलित पध्दतीने करदात्यांची नोंद होणार

पनवेल/पालिका प्रशासन : मालमत्ता खरेदी विक्री करतेवेळी सहाय्यक निबंधक पनवेल यांच्याकडे नोंद करताना पनवेल महानगरपालिका कर देयकावरील मालमत्ता सांकेतिक क्रमांक (UPIC ID NUMBER) आपल्या दस्तामध्ये नोंद करणे आवश्यक असल्याचे महापालिकेच्यावतीने जाहिर करण्यात आले आहे. या क्रमांकाद्वारे खरेदीदाराची स्वयंचलित पध्दतीने करदाता म्हणून नोंदणी होणार आहे. ही सुविधा राबविणारी महाराष्ट्रात मुंबईनंतर पनवेल महानगरपालिका ही दुसरी महानगरपालिका असल्याची माहिती आयुक्त गणेश देशमुख यांनी दिली आहे.

या पार्श्वभूमीवरती आयुक्त गणेश देशमुख ,नोंदणी व मुद्रांक शुल्क विभागातील सहाय्यक दुय्यम निबंधक पनवेल3 ए. पी चौधरी, सहाय्यक दुय्यम निबंधक पनवेल1 एम.पी.लोद, मालमत्ता विभाग उपायुक्त गणेश शेटे, अभियंता नागनाथ डिगोळे यांची आज मुख्यालयात बैठक झाली. यावेळी स्वयंचलित पध्दतीने नोंदणी करताना येणाऱ्या समस्या व त्यावरील उपाययोजना यावरती चर्चा करण्यात आली.

व्यवसायपूरकता (इज ऑफ डुंइंग बिझनेस) या उपक्रमांतर्गत नागरी स्वराज्य संस्थामार्फत नागरिकांना देण्यात येणाऱ्या विविध नागरी सेवा एकत्मिक स्वरूपात देण्याच्या दृष्टीने पनवेल महानगरपालिकेच्यावतीने महत्वाचे पाऊल पुढे टाकले आहे. महापालिकेच्यावतीने देण्यात येणाऱ्या सुविधा अधिक पारदर्शक होण्याच्या दृष्टीने ही नवीन सुविधा सुरू करण्यात येत आहे. एखाद्या मालमत्तेची खरेदी विक्री झाल्यानंतर त्या मालमत्तेची करदाता अभिलेख (टॅक्स पे रेकॉर्ड) यांवरती नोंद केली जाते. महापालिका देणार असलेल्या या नवीन सुविधेअंतर्गत महापालिका हद्दीतील मालमत्ता खरेदी- विक्री करतेवेळी सहाय्यक निबंधक पनवेल यांच्याकडे नोंद करताना महानगरपालिकेच्या कर देयका वरील मालमत्ता सांकेतिक क्रमांक आपल्या दस्तामध्ये नोंद करणे आवश्यक असणार आहे. तसेच मालमत्ताधारकांनी मालमत्ता खरेदी करताना मालमत्तेचा मालमत्ता कर थकबाकीसह पूर्ण भरणा केलेबाबत खातरजमा करुन पावती आपल्या दस्तास जोडणे आवश्यक आहे. मालमत्ताधारकांनी आपल्या नोंदणीदस्तामध्ये मालमत्ता सांकेतिक क्रमांक नमूद केल्यास आपले नाव महापालिकेच्या मालमत्ता कर प्रणालीत तात्काळ दाखल होणार आहे. यामुळे खरेदीदाराला पालिकेकडे करदाता म्हणून नाव नोंदणी करण्यासाठी वेगळा अर्ज करावा लागणार नाही, तसेच मालमत्ता धारकांना आपले स्वत:चे कर देयक पालिकेच्या वेबसाईटवरती सहजरित्या उपलब्ध होणार आहे, अशी माहिती आयुक्त श्री.गणेश देशमुख यांनी दिली आहे.

या आर्थिक वर्षामध्ये महापालिकेचा मालमत्ता कर भरणाऱ्या मालमत्ताधारकांकडून उत्तम प्रतिसाद दिसून येत आहे. एप्रिल महिन्यापासून ते आज दिनांक 21 नोव्हेबरपर्यंत 213 कोटी रूपयांची भर महापालिकेच्या तिजोरीमध्ये झाली आहे. ऑनलाईन पध्दतीने मालमत्ता कर भरल्यास मालमत्तांधारकांना दोन टक्क्यांची सूट देण्यात येत आहे. महापालिकने मालमत्ता कर ऑनलाईन भरण्यासाठी ‘PMC TAX APP’ मोबाईल ॲप विकसित केले आहे. तसेच www. panvelmc.org या वेबसाईटवरती जाऊनही आपला मालमत्ता कर नागरिकांना भरता येणार आहे.

या नवीन सुविधेमध्ये पालिका कार्यक्षेत्रातील मालमत्ता धारकांनी मालमत्ता खरेदी करण्यापूर्वी खरेदीदाराने मालमत्ता कर पूर्ण भरला आहे की नाही यांची खात्री करावी. तसेच खरदी विक्री दस्तांमध्ये मालमत्ता सांकेतिक क्रमांक(युपिक आयडी नंबर) नमुद करावा जेणे करून दस्तांची नोंदणी झाल्यावरती महापालिकेच्या सॉफ्टवेअरमध्ये खरेदीदाराच्या नावाचा तात्काळ समावेश होईल. – आयुक्त गणेश देशमुख, पनवेल महानगरपालिका

स्वयंचलित करदाता नोंदणी पध्दतीचे फायदे –
1.करदाता नोंदणीच्या वेळेत बचत होऊन पेपरलेस काम होणार.
2.मानवीचुका कमी होणार.

3. शंभर टक्के अचूकपणे मालमत्ता धारकाच्या नावाचे समावेशन होते.
   4.नागरिकांना मालमत्तेवरील नाव बदलण्यासाठी महापालिकेत येण्याची गरज लागणार नाही.
   5.दस्ताऐवजांमध्ये मानवी हस्तक्षेप राहणार नाही.
4. जलद लोकाभिमुख पारदर्शक पध्दतीने कारभार होणार.