प्रतिनिधी (पालिका प्रशासन) : सदनिका विक्री करण्यासाठी सिडकोने हेलिओस बाजार आणि थॉटरेन्स डिझायनर प्रायव्हेट लिमिटेड या कंपनीची नियुक्ती करून शेकडो कोटींची उधळपट्टी होत असल्याच्या प्रकाराची चौकशी करण्यासाठी पाठपुरावा करूनही केवळ आश्वासनाची चॉकलेटबाजीच सिडकोच्या व्यवस्थापकीय संचालक अनिल डिग्गीकर हे करत असल्याने शुक्रवारी मुंबईतील सिडकोच्या कार्यालयात व्यवस्थापकीय संचालक अनिल डिग्गीकर यांना चॉकलेटचा पुष्पगुच्छ भेट देत कॉंग्रेसचे नवी मुंबई जिल्हा प्रवक्ते रविंद्र सावंत यांनी त्यांचा निषेध करत त्यांना पुन्हा हेलिओस बाजार आणि थॉटरेन्स डिझायनर प्रायव्हेट लिमिटेड कंपनीबाबत लेखी निवेदन सादर केले.

या निवेदनात कॉंग्रेसचे प्रवक्ते रविंद्र सावंत यांनी सिडको सदनिकांच्या विक्रीसाठी हेलिओस बाजार आणि थॉटरेन्स डिझायनर प्रायव्हेट लिमिटेड कंन्यांची नियुक्ती करून त्यांच्याशी झालेल्या कराराची चौकशी करून हा करार तात्काळ स्थागित करावी, हेलिओस बाजार आणि थॉटरेन्स डिझायनर प्रायव्हेट लिमिटेड या कंपनीस देण्यात आलेले १५० कोटी रूपये पुन्हा वसूल करावे, संबधित निर्णय घेण्यास सिडकोला भाग पाडलेल्या व सिडकोच्या नुकसानीस जबाबदार असलेल्या सबंधित वरिष्ठ अधिकाऱ्यांना निलंबित करून त्यांची चौकशी करण्याची मागणी निवेदनात केली आहे.नवी मुंबई शहराची निर्मितीच सिडकोने केलेली असून गेल्या साडे चार दशकांमध्ये नवी मुंबईमध्ये निवासी वास्तव्यासाठी येणाऱ्या अत्यल्प उत्पन्न गटापासून ते उच्चभ्रूपर्यत सर्वांनाच गृहनिर्माण संकुलाची सुविधाही सिडकोने स्वत: बांधकाम करून दिलेली आहे. सिडकोच्या सदनिका विक्रीला निघाल्यावर सर्वसामान्यांच्या त्यावर उड्या पडतात. खासगी बिल्डरांचे गृहनिर्माण प्रकल्पात सदनिका असतानाही रहीवाशांच्या सिडकोच्या सोडतीकडे नजरा खिळलेल्या असतात. सिडकोला आपल्या सदनिका विक्रीसाठी कधीही जाहिरात करावी लागलेली नाही अथवा कोणत्याही कंपन्यांची नियुक्ती केलेली नाही. सिडकोने तळोजा, खारघर, उलवे, बामणडोंगरी, द्रोणागिरी या भागात बांधकाम केलेल्या गृहनिर्माण प्रकल्पातील जवळपास ६० हजार सदनिकांची विक्री करण्यासाठी हेलिओस बाजार आणि थॉटरेन्स डिझायनर प्रायव्हेट लिमिटेड या दोन कंपन्यांची नियुक्ती केलेली आहे. विशेष म्हणजे या कंपन्यांनी वर्षभरात यापूर्वी एकाही सदनिकेची विक्री केलेली नाही. या कंपन्यांना ६९९ कोटी रूपये सिडको देणार आहे. त्यातील १५० कोटी रूपये सिडकोने त्यांना दिलेही आहेत. १५ ऑगस्टपासून सदनिकांची विक्री सुरू होती. त्यापूर्वीच १५० कोटी रूपये सिडकोने या कंपन्यांना अदाही केले असल्याचे रविंद्र सावंत यांनी निवेदनात म्हटले आहे.

अत्यल्प उत्पन्न गटापासून ते उच्च उत्पन्न गटातील रहीवाशांसाठी सदनिका व दुकानांची सिडकोकडून विक्री होणार आहे. मुळातच सिडकोच्या सदनिका हातोहात विकल्या जातात. त्यासाठी कोणत्याही कंपन्यांची गरज भासत नसताना ही जवळपास ६९९ कोटी रूपयांची उधळपट्टी कशासाठी? या ६९९ कोटी रूपयांमध्ये सिडकोचे अन्य प्रकल्प मार्गी लागले असते. कोणा अधिकाऱ्याच्या सुपिक मेंदूतून ही संकल्पना आली, याचाही शोध घेणे आवश्यक आहे. या प्रकारामुळे सिडको डबघाईला जाण्याची भीती असून भविष्यात कर्मचारी-अधिकाऱ्यांना वेतन देणेही अवघड होवून बसेल. सिडको सदनिकांच्या विक्रीसाठी नियुक्त करण्यात आलेल्या कंपन्यांची व त्यांच्याशी झालेल्या व्यवहाराची मंत्रालयीन पातळीवरून चौकशी करून हा करार रद्द करावा. सिडकोच्या सदनिकांची विक्री तात्काळ होत असल्याने व हजारो वेटींगलाही राहत असल्याने सिडकोला सदनिका विक्रीसाठी कंपनीची आवश्यकता नाही. या प्रकाराची चौकशी करून या कराराला स्थगिती देणे आवश्यक आहे. या कराराला स्थगिती देताना हेलिओस बाजार आणि थॉटरेन्स डिझायनर प्रायव्हेट लिमिटेड या कंपनीस देण्यात आलेले १५० कोटी रूपये पुन्हा वसूल करण्यात यावे तसेच संबधित निर्णय घेण्यास सिडकोला भाग पाडलेल्या व सिडकोच्या नुकसानीस जबाबदार असलेल्या सबंधित वरिष्ठ अधिकाऱ्यांना निलंबित करून त्यांची चौकशी करण्यात यावी. ज्यायोगे सिडकोची होत असलेली उधळपट्टी आपण टाळण्यासाठी संबंधितांना निर्देश द्यावेत अन्यथा सिडको भवनमधील आपल्या दालनसासमोर आम्हाला आंदोलन करावे लागेल याची आपण दखल घ्यावी, अशी मागणी रविंद्र सावंत यांनी निवेदनातून केली आहे.

यापूर्वीही याच विषयावर रविंद्र सावंत यांनी सिडकोच्या व्यवस्थापकीय संचालकांना ३ ऑगस्ट २०२३ रोजी निवेदन सादर केल्यावर केवळ चौकशी व कार्यवाहीचे आश्वासन व्यवस्थापकीय संचालकांचे दिले होते. त्यामुळे रविंद्र सावंत व त्यांच्यासोबतच्या शिष्टमंडळाने चॉकलेटचा पुष्पगुच्छ सादर करताना आपल्या भावना व्यक्त केल्या.